‘Beste mundu bat'

Orduan barrio alaia zan gurea. Gabean, goiz aldera arte, sagardotegian kantari. Beste mundu bat, beste sanidade bat, beste gauza bat. Orain politikara geiago jotzen da, ta bakoitzak bere aldera. Beste tankera bateko mundu-klase bat dator». Barrioaren izena Epele da, eta irakurri nituen egunaz geroztik gogoan josi zitzaizkidan hitz horiek esan zituenarena berriz, Pablo Zubiarrain Ernani Txikia, bertsolari ikaragarria izandua bere denboran.

Bi gauza daude hor gure munduaz: pegatinkidetza politikoa da bata, eta autismo esistentziala bestea. Bat hura jakinegia da, baina beste hau ez hainbeste, eta hartaraxe noa: etxe-zokoko kosmopolitt edo kanpoeder telematikoen civilizatione semibarbaro monoreferential hyperinformatu hauxe dago erakusten jendeak gizabanako eta gizabanakoak gisabanako egin zirenez geroztik, ez duela berdintasun asperragorik ezagutu gure munduak. Nor bere gisara eta denak (demokratikoki gehienak) gisa berean: horratx gisabanako askeen Libertatearen misterio dolorezkoa.

Bi gauza zeuden, eta baita lau beste ere: «beste mundu / sanidade / gauza / tankera bat». Ba, lau hitz eta lau arantza horietxek dira, oroz gainetik, gogoa aldizka zulatu nahi didatenak. Zergatik ote da?